Qymyri mbetet ende burimi kryesor i prodhimit të energjisë elektrike në Kosovë, pavarësisht trendit global të vendeve që po zotohen të heqin dorë nga qymyri në përpjekjet e tyre për të luftuar krizën klimatike. Në Kosovë, qymyri përbën 90% të prodhimit total të energjisë, ndërsa vetëm 7.9% vjen nga burimet e ripërtëritshme si era dhe dielli.
Në Kosovë, kompania Elen Solar, në pronësi të Lulzim Sylës dhe vëllezërve të tij, Afrimit dhe Avniut, është pioniere në sektorin e energjisë së ripërtëritshme. Me mbi 30 vjet përvojë në instalimet elektrike në shtëpi dhe ndërtesa, ata gjithmonë i kanë ndjekur trendet e tregut duke marrë pjesë në panaire elektrike. Këto panaire i ndihmuan të ishin në hap me zhvillimet aktuale dhe u sollën ide të reja.
“Vizitova panaire kudo dhe pashë se po vinte një kohë e re për energjinë diellore. Në fakt, në Evropë kjo tashmë po ndodhte. Kështu i thashë vetes: do të fillojmë të punojmë edhe ne me këtë,” tha Syla. Ai filloi ta nxisë kompaninë të punojë me energjinë diellore 10 vjet më parë.
Si ekonomist me profesion, Syla mori përsipër planifikimin strategjik të rritjes së kompanisë. Në projeksionet e tij, ai filloi të ndajë buxhet, kohë dhe investime për zhvillimin e energjisë diellore përmes paneleve fotovoltaike. Këto panele drejtkëndore përmbajnë qeliza fotovoltaike dhe pozicionohen për të kapur në mënyrë efektive dritën e diellit. Kur këto qeliza ekspozohen ndaj dritës së diellit, elektronet shkëputen dhe lëvizin. Kjo lëvizje e elektroneve krijon tension, i cili nga ana e tij prodhon energji elektrike.
